Day 20 最強吐痰民族(哈薩克Taraz)

(Day 20) 2009-07-11
住宿:火車上

行程:Taraz

8點幾食完個幾豐富既早餐，然後又瞓返又沖涼，攪到12點先準時check out

Taraz呢個地方真係無聊又悶，最主要節目只係逛市內最大既市集，同去電信局上網...

逛市集

係市集都見到阿清比BB玩既玩具!

原來係哈薩克,磅重都係一門生意黎架~

吐痰既文化可能第一時間就諗起內地人，不過... 原來哈薩克人先至係真真正正既吐痰民族!

我係度要幫我地既同胞平反!!! 由進入哈薩克開始，就不停見到人隨地吐痰! 不論身穿制服既警察、阿伯、青年、小孩，都全民大吐痰!!!

有一次係巴士上，見到有幾個職員不斷吹水，就不斷吐痰係自己架車度，吐到一大灘...十分之嘔心!

係臨離開Taraz，係巴士站等巴士去搭火車時，亦見到一家大細既當地人係巴士站一齊等車，其間見一個年紀最小既細路，約6-7歲，係一個180度轉身時連環吐幾啖口水，攪到成家人哈哈大笑...

我諗最強既一個吐啖民族就係咁樣發展出黎lu... 

係Taraz真係好悶無野好寫... 不過夜晚係火車站等車時無拿拿比人鬧! 

話說當時火車站仲有好多位無人坐，我地坐係一張張櫈度，而哈薩克既地下仲污糟過大陸，所以連埋個背囊都放上張櫈，突然有個阿怕向我地不停咁大聲講野，起初我仲以為係d乞兒討錢無理佢，點知越講越大聲係咁鬧仲搵電筒照我d行李，此時我先知原來佢想坐...

其實環顧四週仲有好多位，佢咁多位唔坐偏偏要坐係我隔離! 咁唯有起身law... 好聲好氣唔得既，係要鬧人既⋯

火車上，我地搭火車係4人包箱，另外兩人係內地夫婦，不過亦都係零交流...