回憶之旅 -- 韓國五天團

韓國五天團 2001

當我畢左業,離開了父母既父蔭後,就係我既旅遊路上,踏入結伴同遊既階段lu~

我認識左一個好重要既人,係佢令到我愛上旅行的;雖然係佢令到我鍾意去旅行,但係佢係從未出過國架!

大家認識左兩個多月就一同去旅行,係韓國五天團!出發係2月15日,還記得之前一晚大家一大班朋友一齊玩通頂tim~

跟住就各自各返屋企攞行李,第一次搭機場鐵路,勁貴!

坐左十個鐘頭飛機終於到達當時叫既"漢城"...無錯 ! 係十個鐘! 因為漢城落大雪,機場關閉,需要清理跑道,所以轉飛釜山機場等候...

出機倉既感覺係... 好似入左個大雪櫃咁呀~ 到達漢城已是夜晚lu...

第二日瞓醒,終於睇到迷人既雪景,一片白茫茫~

今次行程有d失望係... 韓國無靚女! 起初覺得韓國會好多靚女! 點知週圍都係"阿朱媽",後生既都唔靚; 就算去到女子大學 "梨泰園" 情況都一樣...

而攞到既經驗係... 去冰天雪地既地方一定要著對厚底 d 既鞋! "薄砌砌"既波鞋令到我雙腳板鬼死咁凍!

開心既係係成團人拉大隊去華克山莊賭場,我有幾百蚊港幣既斬獲~ 最後激氣既係最後係機場時比駐韓國既導遊串...

一個旅行團一定有一個領隊,駐當地既導遊,但係韓國就會多左個話係當地旅遊局既人隨團影吓相咁; 其實佢都好nice,好好人,到行程既最後當然影左一疊相比我地揀... 我記得好似係要幾十蚊港幣一張相,影左十幾張咪差唔多成千蚊!!! 個團都係千零蚊咋! 不過我都無所謂,比我隔離果個揸fit,因為我地想揀合照,但咁多張就只有一張係合照,怪就怪佢唔識影law! 佢最後都係揀左三張咋...

咁咪攪到最後係機場道別時,駐當地既導遊同我講: (返到去搵多D錢啦) 我當時都不以為然,但入左閘後唸返起,先知佢原來串緊我幫佢拍擋買得少相tim...

激氣呀!!! 無仇報tim...

其他擇要

=======

茂朱渡假村 :由學滑雪變為玩雪; 係山腰既滑雪道旁浸溫泉

樂天世界 : 跳樓機 (原來我發覺係唔鍾意玩刺激既機動遊戲架 )

想post D相上黎發現 ,原來當時係唔影風景相架 ,只係影人像照 ,可能係果時仲用緊菲林相機 ,驚浪費菲林瓜 ... 所以好不容易先搵到一張雪景相