2017年5月6日 星期六

Day 2 (上) 聽君一席話(日本東京)

(Day 2) () 2016-6-21
行程:東京->洛杉磯


今天分別約相了兩位居住於日本的朋友聚餐,更真實地了解日本文化。早餐約了港女多年前睇Band show結緣,現於東京工作的香港人Monica;午餐則約了我在十多年前埃及之旅認識的日本朋友Nori。認識我耐的朋友都知道我地老友鬼鬼,Nori已跟我於香港見過兩次,其中一次找我協力拍攝旅遊特輯添,今次終於輪到我來到日本約他食飯了~



今早0630起床,可惜天氣不似預期,落雨… 0730帶齊行李來到池袋站,Monica帶我們到一間酒店的餐廳吃早餐。由於轉機時數少於24小時,不算是停留,大型行李早於香港出發時已寄艙,並會直接送到美國,所以我們只携輕便行李在於東京遊走。



Monica交談,趁機了解日本文化,包括好多崇日的香港人嘅誤解。我就著好多臉書上曾經看到的帖文發問,她也一一解答。首先就是日本連鎖服裝公司實施四天工作,仲話日本越來越多公司效法,令港人為之瘋狂。她稱在日本工作想請幾日假都極度因難,長假旅行根本唔使諗,她偶爾趁長假期回港,也會有不好意思的感覺。四天工作可能有都唔出奇,但是一定極少數。其後也講到住屋問題及搬屋公司,因為早前臉書上看到一段日本的搬屋公司的片段,搬運職員一絲不苟地將每件傢私入箱,去到新屋後又細心擺放於適當位置,留言羨慕不已,又話日本幾咁好,香港要學習云云。她回答係有嘅,不過跟價錢成正比。她剛好早前搬家,同區最平也要3千港幣,聽落跟香港相約,但只是運送費用,不包括搬落樓的。她稱一個女仔不能搬,而且東京好多住宅也是沒有升降機的,最後當然錢解決到的問題就不是問題,所以臉書上瘋傳的搬屋服務,是以天價來換取的。最後,看日劇長大的我,當然想了解日本的寫字樓文化,原來真的如《戀愛世紀》裡的松隆子一樣,「斟茶遞水」等雜務工作一切由女性來負責架!一個早餐時間對日本文化加深認識,發現香港人真的成日攞外國最好嘅事來跟香港最差嘅來比較…




食完早餐,原定與港女去於東京較有日本傳統氣息的淺草,可惜落雨唔去了,唯有改為於池袋這一帶逛街,可惜太早全部未開門。於街道上看到有人大排長龍的店舖,原來是香港旅遊雜誌都有推介的食店,最出名是蘋果批。見將美食放於第一位的港女雙眼發光,亦盡老公的的責任,叫她在簷蓬躲避,我於毛毛雨的室外排隊,好在不是等候太久便買到,但都係納米比亞嘅最好食。😌😌😌 係門口食蘋果批時,竟撞到港女的好姊妹的細佬,可想而知日本是港人最愛的旅行地點。


之後行百貨公司,第一次等待百貨公司開門,當時還有數名日本人一同等候。買了把超輕的縮骨傘¥5xx,及一些旅行用品。


都有不少人等候百貨公司開門

臉書上經常見到有人去日本掃呢D貨



行到1115, 便前往銀座的一所酒店大堂會合Nori。由Nori帶我們到附近一家日本料理,食¥3000廚師發辦的套餐。只見廚師跟Nori交談,交談後Nori稱今日會食甚麼款色的食物,有幾多度菜,及會有甜品等。
港人食刺身熱愛築地市場,但原來Nori話頂級刺身通常會由築地魚市場送到來銀座這一帶,因為這裡消費能力較高,並叫我們看看店內所有人都著西裝,便可知一二。觀察後發現只有我們三人著短衫短褲,會不會失禮呢?哈哈~ 我們經常聽到的築地市場,原來質素較為大眾化,真係唔講都唔知。老友相聚當然談天說地啦!Nori也問到香港的熱話,某書店情形。


結帳每人¥3000,現在7算計,即每人只是二百幾港幣,聽港女係香港食每人起碼過千呀!這餐當然是由我爭取成功請客啦~ Nori再講,晚上價錢應該貴幾倍,因為晚上無這些set lunch,是需要客人跟廚師溝通過後,廚師便會因應客人嘅預算及喜好,源源不絕送上壽司,直到客人叫停為止。這些食店應該較少遊客光顧,尤其晚上,因為店內職員大多只懂日文,而晚上用餐是要跟廚師溝通的。早前係面書上有人分享,狂鬧某間廚師發辦餐廳是收取天價的黑店。原來是文化差異問題,又唔識日文唔了解當地文化,又唔識叫停,咪弄出大笑話囉,所以香港人都唔係好得過某種人好多咋!


午餐後Nori送我們搭車,帶我們搭京成本線,每人¥1330,由銀座往成田機場需時70分鐘。




店舖門口一角,Nori話是當地人的習俗。


回港後跟一個「日本通」同事提及「廚師發辦」,為何要跟他提及?就是因為在他眼中只有日本最好,更經常貶低其他國家,一聽見人話去其他國家就必定話好危險、好落後、好悶。原來他這個「日本通」竟然未食過廚師發辦,甚至未聽過,看來他只玩的很片面。今次不是要跟他比拼甚麼,而是不喜歡他經常以日本來貶低其他國度,他只懂玩樂,縱使每月都去,也是徒然。


這兩個聚餐,深入了解當地的真實一面,真是聽君一席話,勝過睇萬篇網上傳言。像早前某網站的記者細數韓國四大罪狀,而被朋友於臉書上瘋狂流傳。我是一個極力求證的人,當然自己都還未清楚不會亂分享。我便詢問久居韓國、快將做韓國人妻的堂妹求證啦,其中四點有三點都有幾大出入。所以起碼於當地生活幾年,才會真正了解到真正文化的。就像卜友王子,不是於奧地利生活了多年,會了解到當地服務性行業的極慢效率、換門鎖的難處、大廈保安的職責嗎?


離境等候過關時,遠方突然開多條隊,於是吸引了不少人前往,大多數是從眾多嘅隊後方前往。但有兩個女人,其中一個56十歲嘅大嬸手抱著小孩,於我前面穿過前往,看到新隊已排了好多人無乜著數,便索性插隊企係我前面。我當時已經排到中間,正怒啤住佢地,看到他們手持強國護照,而較後生嘅女人用可憐嘅眼神凝望著我們,希望我們原諒咁款,但始終無開口說任何說話,唔通佢以為我地係日本人怕唔識聽?我見佢有老有嫩,又有悔過嘅眼神先忍住唔話佢咋!唉... 為何又係強國人,為何又發生係我身上架... 呢件事,排我後面的日本人全收眼底,你話佢嘅行為及衣著識唔識分係那裡的人吖!



這程ANA航班座位寬敞,更有Haagen Dazs食。於機上睡了兩小時,腰部坐得不太舒服便睡醒了。之後係三萬尺上空享用一下由ANA提供、奢侈只有15分鐘/10mbFree Wifi。這服務兩年前我於American airline初次於經濟艙見到,可惜當時要俾錢所以無用。剛啱睇廣告,阿聯酋選乘A380A777都可享用free wifi,看來不久將來,人人於三萬尺高空上網不時夢了~




10 則留言:

  1. 香港好多後生仔女,去旅行都係吃喝居多,不會去了解人地生活文化。

    回覆刪除
    回覆
    1. 呢個同事比我仲大,四十幾歲人了。。。

      刪除
  2. 4天工作實在太爽了,不過年假係咪會少咗?
    我諗一般人去旅行三五七日真正想去看生活文化的相信不多...
    銀哥冒雨排隊買批咁gentleman,銀嫂一定加分XXD

    回覆刪除
    回覆
    1. 呢d真係要再了解,不過報導有局部放大的成份,我都無興趣深究了。。。
      咁我諗咁難得來到日本都唔去景點,只約人食飯,更加少吧,wakaka~
      果一刻,扮都要扮吓gentleman啦,哈哈~

      刪除
  3. 臉書上經常見到有人去日本掃呢D貨>>> 有中文牌限買都知.

    回覆刪除
    回覆
    1. 依家d香港人唔認,話呢d係大陸人架

      刪除
  4. 我都有食哥間蘋果批...佢唔係唔好食既...一般囉...但如果要我排隊我唔會買~~我地哥日行過見到無人排所以先試下~~~~~~~~(我真係好懶排隊)
    華....餐omakase堅平啦!!!!!!!係澳門食好少少既中午既都要千幾蚊呀!!!!!我都好想試日本既omakase...但我就係驚唔識聽日文....溝通唔到...你仲要有日本朋友做翻譯~羨慕~有d日本既omakase如果你唔識日文..應該會唔俾你訂

    回覆刪除
    回覆
    1. 蘋果批都ok嘅,返正得閒有時間,迷排吓隊囉,哈哈~
      呢餐真係好抵!Nori話唔識日文食omakase真係有點麻煩,早前有朋友話想試,但又唔識日文,所以我都無講出呢間野個名,怕會攪親人地間店。。。 仲有omakase d禮儀,我都係打呢篇blog先知,下次應該唔會影相了。

      刪除
  5. 做人最忌就係成日比較,從來唔會就返件事去評論,好似而家有啲人隨地吐痰隨地大小便,人哋話佢兩句佢就問你係唔係中國人?其實有啲好簡單,你做錯就係做錯,關乜嘢係邊度人嘅事?我覺得最成熟嘅做法就係學習每一個地方嘅人嘅優點,唔好將其他人嘅缺點不斷放大,咁樣自己先可以進步。

    回覆刪除
    回覆
    1. 係,身邊成日比較嘅人好多都無去真正了解,純粹見到D網上文章就嘈埋一份。你講得無錯,所以我去旅行見到人地D優點會去學習,缺點便會時常警惕自己不要去做。而我呢D見聞,正正就係比一些有口話人無口話自己的香港人睇。

      刪除