Day 12 睇極光定係睇月光?(冰島Akranes近郊)

(Day 12)2012-10-02
住宿：Laxarbakki
行程：Syðsta Grund --> Akranes近郊

朝早食完早餐,走去大屋與兩位長者傾計,原來位伯伯已有七十多歲啦! 仲見佢維修自己既大貨車,係車頭爬來爬去,真係睇唔出! 講開佢既飬既生畜,原來D馬用處不太大,不過飬佢又唔使費神,機本上唔使理佢由佢自己食草就得。

開車離去,途經一個叫Varmahilid既地方,資料顯示風景壯麗,係適合騎馬遊覽既地方; 而我同港女都想一騎冰島馬,但不知是否淡季,office重門深鎖...

繼續行程,去到Blonduos,有一間羊毛博物館,當然又係淡季無開啦! 由於呢個鎮都算較大,去超市補給點物資就離開,臨離開見到間好型好cool既黑色木教堂; 深色既教堂我係拉脫維亞第一次見,當時仲覺得係我見過既最型既tim! 估唔到呢度都有一間喎! 午餐時係便利店買左頂成日都係冰島見到,冰島style既冷毛,牌子係Norwear,並同港女一人一頂~(每頂約$200)

及後再向西行,途中見到捲好一碌碌既禾旱草,而且終於搵到係無用防雨袋包實既,於是即時停車影相啦~


血淋淋屠房

羊毛博物館

好似花椒八角咁難食野軟糖,但當地小朋友就好鍾意食!

繼續行程,去到冰島西北面沿海既地方,見有海獅既牌,於是前往叫Hvammstangi既地方,原來係海獅集中地,不過又係季節唔啱... 後來去到一處羊毛製品既工場,亦有羊毛衫賣,價格也差不多,只是平了少少,及 後兩位 女士都買了披肩; 不過最令我意想不到,老闆娘竟然送我一瓶火山灰呀!!! 佢話係2010年火山大爆發時得到,仲有成箱tim! 於是從箱子裝了一瓶送比我,真係意外收獲呢~

 

沿公路南下,去到近Akranes既公路旁,遠處既海面已經日落,見有一間頗具規模既住宿,即時入住!

全間酒店又係比我地包起,又無其他人住! 酒吧裡掛左條利物浦頸巾,原來老闆都係利物浦fans黎架!!! 只見老闆及其他男人(有D應該係附近既工人)係酒吧內飲啤酒睇波,女人則圍埋一枱交流織毛衫心得。 相信冰島每個女人都識織毛衣,唔係全國點會有咁多handmade既毛衣賣呢?

食完自製晚餐後,驅車去遠一點既荒郊等候北極光，難得係漫天烏雲既天空缺口，有一大片無雲既上空，但月光同極光係死敵，明亮既月光偏偏就係呢個位置••• 唉••• 如果有微弱既極光一定比月亮既光芒所掩蓋喇! 苦候個幾鐘都睇唔到，於是返住宿放低好眼瞓既兩位同伴，並上網check極光指數，原來頭先極光指數只是2••• 於是唔死心再外出守候，點知•••烏雲蓋頂了! 加上返到住宿上網check現在極光指數只是1，唯有早抖!

個月亮光到咁,乜光都掩蓋晒啦!