回憶之旅 -- 希臘(二) 雅典

回憶之旅 -- 希臘(二) 雅典

我坐既係泰航,經曼谷轉機,當時係泰航周年紀念,係航機上有抽獎,名額兩個 ,獎品係張機票!!! 無抽獎命既我當然係抽唔到啦...


獎就抽唔到,但係就獎左我一粒眼瘡! 起飛機上開始生左粒眼瘡,成個行程都帶唔到隱形眼鏡,要帶住副眼鏡,又有粒瘡咁肉酸,真係慘…




到左雅典機場,挪左D地圖資料等... 係搭巴士時,認識左一D不同既台灣人;佢地全部都放成個幾兩個月假期,而且佢地全部都係自由行; 其實係搭飛機時我已發現,台灣人係好鍾意去旅行同自由行的,因為飛機上既華人全都是台灣人! 我唸香港人始終係比較鍾意跟旅行團…





其實自由行真係好簡單,旅遊書已經講晒搭幾多號車去邊度等等! 去到希臘,精華當然係小島遊啦~
整個行程係8日! 所以一到步,就根據書中指示,去左市中心既”憲法廣場”買定船票,當時講英文果part梗唔係我負責啦~
(但係依家既我已經可以應付lu)
跟住就挪住行李隨即去遊覽! 因為雅典最出名既衛城就係附近…

好在行李唔算好多 ,一個背囊同一個旅行袋,於是就第一時間去山上既衛城參觀勒~ 不過當時雅典奧運將近,好多建築物都搭晒棚架維修,真係大煞風景呀…



衛城係一個山丘上 ,所以係市中心好多位置都可以望到衛城架~

衛城售票處

維修中既衛城

今次行程既主角"麥兜" ,後面係阿迪富斯劇場

係衛城上可以眺望雅典市中心


Dionysos劇場

聞名既巴特農神殿

Erechthion神殿

之後就去左衛城山下既布拉卡區行街! 呢度集中左好多買手信既商舖同食市,手信就唔買住,留番最後一日再回雅典才買,但係就係露天茶座,食左餐美味既下午茶~




布拉卡區

主角又出現同我飲下午茶啦


街頭週圍都可見到呢d歷史建築物 ,就係因為呢個包袱 ,長期龐大既維修費 ,令到希臘呢個國家好窮...

嘆完茶就去係香港預先book定既酒店check in,但係就截左好耐的士都截唔倒… 明明見住好多架的士無人都唔停低…於是唯有一路行一路再截,最後行左一半路程先截到架的士!


返到香港之後雅典奧運時睇報紙講,原來希臘D的士司機,見到D外國遊客怕溝通唔到,所以好多都唔會停車,真係有錢都無得搭law…



初次到歐洲 ,發現原來D的士全部都係名車 ,當年最新款既"BENZ"呀!!!

成個行程我只係book 左第一日既酒店,係咪好大膽呢~ 我地住既酒店,係Omonia廣場附近既國家博物館後面(都算市中心既); 旅遊書講呢度比較雜亂,原來真係架,因為呢度D商舖好多都空置,週街都嘖晒塗鴉…
可能加上係星期六下午,所以”靜鷹鷹”…係途經博物館個公園時,仲睇到六七個神情呆滯既年青人圍埋一堆,我估應該係” 隊緊草”,唯有扮睇唔到啦!!!



Omonia廣場

係酒店沖完涼後再行出街食野,但係睇見附近既環境都有D驚
其間係條大街度,仲有個迷迷糊糊好似High左野既女仔,問我隔離果個有無coins... 嚇到我地急急腳咁去食野! 連相機都唔敢攞出黎呀!


食完野已經將近黃昏,天色比較黑,更加籠罩住一份陰森既景象; 回程路上亦都見到一個high左野既阿叔,問個婆婆挪錢…
呢度唔通係一個罪惡之城???


返到酒店後就養足精神,因為第二日要晨早搭船去Mikonos呀!!!