續Day3 露宿機場(突尼西亞突尼斯)

(續Day3)2008-10-5

住宿 : 突尼斯機場

行程 :馬耳他 --> 突尼斯

到達機場check in過關,入左禁區去到登機閘口附近後,要係書店既牆角先搵到罕有既插頭來差電… 跟住走左入書店攞左Lonely Planet睇突尼西亞,點知唔睇就尤自可,一睇就…唉…

我去突尼西亞就係想去撒哈拉沙漠,但書中講係內陸地區,內陸地區我都知,但係無唸到都幾遠woo! 怪就怪我無做research...唯有去到先算啦,幾辛苦都要去呀!!!

2050 boarding --2130到突尼斯

突尼斯機場

係突尼斯過關個關員,知我係香港黎,問我做咩職業,又問我港幣係點樣,於是比左張十蚊紙佢睇,佢係我本passport蓋印後不停咁同我講money money... 我梗係扮唔識聽啦~ 跟住見我部手機靚,又係咁講:[HK mobile... souvenir] 嘩!!!貪錢之餘連我部電話都唔放過!!! 當然又扮唔識聽就走啦~ 我唸突尼西亞人同埃及人都一樣咁貪錢架!!!

出到大堂換完錢,攞完旅遊指南都成十點幾lu! “夜媽媽”又邊度夠機場咁安全丫! 就決定係機場瞓勒~

於是係機票櫃台問吓去沙漠城市Douz既詳情,據講長途巴士大約要7粒鐘,朝早先有; 而飛機就晏晝先有$70(dinner),"dinner"係突尼西亞貨幣既叫法! 於是就係度計我既弱項Maths勒! 用左好多好多時間先計出 $1 dir = $0.6 euro; 心目中梗係揀巴士啦! 飛機又貴又要係機場癡呆到晏晝!!!

跟住係廁所擦牙時,遇到個加拿大遊客,他剛玩完突尼西亞,仲推介左幾處必去既地方tim~ 就係去Douz join tour 入沙漠,去一度叫”Ksar Ghilane”既地方,及強烈推介Matmata住洞穴屋!

最後食完野就搵到掛有插蘇既長櫈瞓覺lu~

一路食野一路計算匯率...呢度都要HKD$30架...

係Departure Hall搵到個位瞓覺,但瞓得好辛苦!