Day 3 貝加爾湖風光(俄羅斯Listvyanka)

(Day 3) 2013-06-12

住宿 :不知名民宿

行程 :Listvyanka

9點起床食早餐，港女雙眼好番好多啦！

食完早餐係酒店休息及四圍影相，直到1200 check out; 之後去返尋日揾過既平價民宿$1000-RUB一間房($250-HKD) ，但就無得淋浴，要用膠殼裝水，而廁所亦都只係得個窿果d...

右上: 要洗手唔該自己加水, 同我係烏茲別克見到既一樣~

於是安頓好就隨即化妝裝身出發，前往早前係Irkutsk Hostel個reception介紹既教堂出發影婚紗相！ 

經行錯路吓去到教堂，教堂不太特別，無東正教特別既洋蔥頭，不知是否東正教教堂，有點失望⋯ 不過既然來到都影啦! 

見有個小姐正在打掃，禮貌上都要雞同鴨講問一聲既，示意許可下，港女即時除去大褸，打底既係小背心，一笠件婚紗就可影相影左一大輪，都用左好多時間，女既又要換衫，又要諗pose,尤其是擺pose，雖然我已save左好多website來參考，但都好似作用不大... 其實影婚紗相都真係幾煩... 

沿途回程，小橋流水，風景幽美，興致勃勃之下，拿起帶來既Ukulele演奏一首先~

Ukulele係一種夏威夷結他，size亦有好多款，我帶得來旅行當然係最微型最輕架啦~(輕過部相機) 我之前從未學過任何音樂，今次仲要未學行先學走，捨棄比較容易既拌奏(通常自彈自唱)，由於我唱歌太難聽，所以苦練一首solo來旅行彈奏，精挑細選下，最有旅行feel當然係Beatles既Imagine啦!

影完都1630,選擇左個蒙古包餐廳，兩餐食埋一餐，類似大型既小籠包好美味呀！ 於是學其他人都係頂部個窿落豉油，然後就咬穿佢係咁吮包內d湯汁，一個字，正！ 

係湖邊行左陣就回程，貝加爾湖既風光, 望出去好似係香港海邊無乜分別... 尤其似我住既屯門馬頭望出去，可能個湖實在太大了，似個海多D~ 行到超市買定明天既食物，因為火車上無野食的！ 另外買左只係貝加爾湖獨有既魚Omul, 煙燻左啡色，好似之前係烏茲別克鹹海所見既魚一樣呀！ 我諗係因為方便保存。

不知是否酒店

帶埋貓咪BBQ

貝加爾湖既風光, 望出去好似係香港海邊無乜分別...

觸摸吓湖水先~

煙燻Omul

返到酒店趁個天未黑，未嚴寒既時候即時沖涼先，攪一大輪先知原來係用現代電捧煲熱d水，等我仲懶醒去燒柴，仲燒咗人地幾條大紙皮都透唔著個火... 原來燒柴係用來焗Sauna架！

沖完又開餐，食Omul, 煙燻左好鹹，所以飲啤酒，好在兩樣都有買，如果唔係條魚一定食唔晒，而唔係太鹹既話，咁大罐啤酒又係飲唔晒~