Day 12 最正Hostel（贊比亞Livingstone)

(Day 12) 2015-09-22

住宿：Jollyboys Hostel

行程：Lusaka —> Livingstone 

今日即將前往贊比亞Livingstone，是會合港女嘅地方，也是非洲南部最熱門景點之一，維多利亞瀑布所在地。我橫渡非洲路程嘅中間位，即是旅途已過了一半了～ 這裡是這旅程嘅分界點，前半部用最地道、經濟嘅方式來游走；後半段則用上豪華遊、自駕、及我從來未玩過嘅露營車。非洲南部自駕、非洲玩camping，真係諗起都覺得型呀！這趟旅程用了各種不同嘅方式，感受原始嘅非洲南部，絕對係珍貴嘅經歷。

於非洲一千蚊一晚嘅酒店渡過，行程到目前為止算是最好瞓嘅一晚了，多日來肚痛令到睡眠不足，一下子就復原啦～ 精神晒～ 我只係講睡眠，無話個肚⋯  起床後先去大堂用餐處食豐富嘅早餐先，都幾多野食，唔理肚痾了～ 記得當時嘅音樂係激昂嘅The Final Count Down.

食飽飽後行吓對面個商場，一站式乜都有，也有間找換店，見到大額美金原來會有更好嘅匯率，等我出發前仲特登換D細面額嘅美金添... 你知啦，大面額嘅美金係落後國家通常都唔收嘛。我好記得當年係埃及買$6x美金嘅火車票，竟然$100面額嘅美金唔收，激到我死！

連日來趕路、限時限刻咁趕長途巴士，相信已追返當日因攪Visa所耽誤嘅光暗了。今日唔再趕車，因為下一站係非洲南部最熱門景點之一，相信有好多車前往，我都費事問人幾時有車。於是回酒店check out，施施然咁攞齊行李去返尋晚落車嘅巴士站。日光日白看清楚，原來酒店位於大馬路，兩旁又長滿了紫花樹，好靚～

穿過尋日嘅油站，就到巴士總站，依家日頭睇返，嘩！好大，也很亂！有N咁多間嘅巴士公司。其實巴士站百多米前已有一、兩人向我不停推介巴士，已經話no need thanks，但都死跟。一入到巴士總站範圍更甚！一群人圍住我不停講野，我都無鬼理佢地，好x煩，我自己唔識睇咩！直至有人掹我件衫，我感到有身體接觸，真係怒不可遏！一聲咆哮，全部靜晒下來，默默跟著我身後。依家諗返都好好笑，可見孔武有力嘅非洲人只是想搵錢，心地幾咁善良呢～ 其實有好多車去Livingstone，便求其上左架Shalom公司嘅巴士$120-Kwacha（$100-HKD)，約7小時，剛好現在1130開車。贊比亞貨幣跟馬拉維一樣都係叫「瓜柴」，可惜面額相差甚遠。

一入巴士站，D當地人就開始向我重重包圍

坐呢架巴士

巴士上除了有人賣野，也有人傳道，講得字字鏗鏘，十分激昂，可惜最後都係叫人捐獻⋯

當地人好鍾意將架車裝飾成自己嘅愛隊，可見當地好鍾意足球

路經市中心D商場

途中停過幾次中途站，廁所（開細）$2-瓜柴，蘋果汁$8-瓜柴。$1.2瓜柴=$1-HKD。

早前講過越往西走，公路上源源不絕步行嘅當地人已不復見。來到贊比亞則見到較多人於公路上踩單車，可見當地生活越來越富庶。

中途站

可能近河流，有大魚賣

坐長途車又一日

Livingstone

將近到Livingstone 時天已黑齊，又於車上著電筒照住睇資訊，睇邊間酒店最近，邊間好。LP最推介嘅jollyboys 於車站最近，當然是不二之選啦！

可惜永遠都係初到埗時分不清南北西東，係巴士上時問第一個人，博物館方向係邊，心諗我都醒啦，唔直接問Jollyboys費事被人呃錢，不過佢仍知我要搵jollyboys，(因為jollyboys就係博物館隔離），講了一些我都聽唔明嘅英文又無話俾我聽，巴士便到站要落車。我感覺佢係唔想話我知，想我俾的士掠咁！好在之後再問另一人就指出方向。

於是又要摸黑搵住宿，搵到條街名對對LP地圖，應該向南走，隻錶指南針有作用了。不知是否撞彩，無耐轉到最易認嘅大街，轉多兩個彎就到了。非洲眾多城市，就算首都大部份都無街燈的，初到貴境要摸黑搵住宿真係有有些少難度。

jollyboys真是一流，先講reception，已有埋旅客中心，各種活動均可預約，紀念品postcard亦有齊。

有8人16人Dom、2人房4人房、茅屋仔、露營區任君選擇。我揀了8人dom，$15-USD，一入房竟然全是女的。。。唔通與女性咁有緣？這裡算是我見過暫時最有規模，最正嘅Hostel了，這裡嘅住客亦有同感。

住宿內有酒吧，早午晚三餐可於這裡攪掂，我食了個蔬菜漢堡，估唔到食齋都整得咁好食噃！連汽水$45-($38-HKD)。睇了兩場欖球世界杯，都是強強對碰。記得其中一球，只差十多碼就能得分，但係果十多碼範圍內打攻防戰打了十多分鐘，睇到熱血沸騰！這旅程對欖球了解不少呢～

接待處

活動報名櫃臺

各種Safaris活動任君選擇

好多住客於sitting area上網或吹水，我都當然上吓網啦～ 係Hostel內幾relax，可惜又係多蚊，諗住上一陣網就瞓，點知認識了位韓國年青人。佢係男嘅叫阿Kim（唔好成日話我識女仔）可能大家同是亞洲人，特別投緣。他操流利英語（韓國人較少見），也是流浪了一段好長時間，遊走了非洲多國，並講到過境津巴布韋時因簽證問題被拘留。因我英文有限，相信是他的簽證只是一次性，而玩橫跨兩國嘅維多利亞瀑布係要兩面遊走，就係咁被拒再入境囉… 講到口乾佢請我飲啤酒，傾開他原來從納米比亞過來，也得到了一些資訊。不過講到佩服就當然是他也愛向難度挑戰，稍後會去仲有戰亂嘅剛果民主共和國添~ （事後fb知道真係去左）

唔得啦，周公急call要瞓啦! 來到住宿後痾了一次，看來好返好多了~

一半啦~