Day 11 饑饉三十非洲篇(贊比亞Lusaka)

(Day 11) 2015-9-21

住宿：Stayeasy Hotel

行程：Lilongwe (馬拉維) —> Lusaka(贊比亞)

逗留了馬拉維首都一個晚上，今日就要馬不停蹄一路向西，坐長途過境巴士往贊比亞首都Lusaka。為何咁急？咪想追返早前攪簽證浪費咗嘅光陰囉⋯

由於個肚繼續唔舒服，瞓得唔係太好。尋晚瞓落床無幾耐、點零鐘痾了一次，到今朝0400起床再痾多次。由於今日係移動日，無得舒舒服服去廁所，便啪了喇叭牌。以及補反食每日早晚食醫生處方嘅瘧疾藥，尋日掛住痾都唔記得食添⋯

0445離開Hostel，清晨時份非洲嘅室外好清涼。等了一陣，約好嘅的士來接我往長途巴士站。車程只需5分鐘，係尋日講好嘅價錢$3500-MWK($7-USD)，貴！無計，晨早流流又唔識路，焗俾佢賺。

到達巴士站，的士司機一指，就見到前往贊比亞嘅過境巴士。車費$18000-MWK ($288-HKD) 14小時，咁多個鐘都應該抵呱？求神拜佛咁長途車唔好肚痾⋯ 咦！我諗到辦法喇！嘅然一食就痾，咁唔好食野落肚咪得囉！計計吓，自尋日下午食過漢堡包後都未食過正餐，只係尋晚食過幾塊餅，應該都痾清呱？加上食埋止痾藥應該無問題嘅~ 就來過飢饉三十吧。

0600準時開車，巴士坐唔滿。開車無耐開始天亮，去到市中心另一個站再上多D客。這裡看到租車公司，如下次再嚟一定租車自駕去Cape Maclear~

0815到達邊境，自入境馬拉維遇到問題後好擔心，加上尋晚睇嘅雜誌又話特區要簽證⋯我成日覺得橫渡非洲多國，要用過五關斬六將來形容呀。好彩，最後都順利過關，Yeah~ 不過期間好多謝坐係附近位非洲大媽，佢好關心我，係關口換錢時又幫我格價。

贊比亞

進入贊比亞國境後，巴士行駛了兩個零鐘，到達一個大站叫Chipata，這裡好多人上車，坐滿咁滯。係這個站一停就停左40分鐘。

進入贊比亞所見，建築風格開始略有不同。村落的建築物呈圓形，而每條村都有大形籃狀物體，一問之下原來用來儲存玉米的。除了建築風格，連公路上實況也大不同。記起最初莫三比克，就算你坐十個八個鐘頭長途車，公路旁你總能看見駱驛不絕嘅當地人，或頭托物件、或左背著嬰孩在步行。進入馬拉維後這些情況相對減少，而來到贊比亞更不復見添。可見越往西走，就越富裕。而且贊比亞這邊土壤較早兩國所見深色得多，呈深褐色，為何咁紅呢？

中午時分巴士職員派發食物，之後有人收垃圾，終於開始見到有返D公民意識了。因為喺莫三比克同馬拉維坐公共汽車，D人有垃圾都係順手就掉出窗外。不過最後所見，職員group埋一大袋垃圾，都係掉起公路旁。其實已算是一大進步了~

去到一個休息站，部份乘客落車買午餐，我就餓到打鼓都死忍。當隔離個非洲大媽知我肚痛玩緊飢饉，忍唔住笑左好耐。

右上：兩姊弟在謀生
右下：好有型嘅髮型

巴士路線經過贊比亞最南部近津巴布韋邊境地區

贊比亞首都Lusaka

天剛好黑齊時終於到達贊比亞嘅首都Lusaka。進入市區後，不停金睛火眼咁望吓附近有無住宿，原來都有唔少，間唔中仲見有中文字嘅旅館添，可見這裡多都幾中國人來。可惜這些都遠離巴士站，今晚諗住繼續住好D，便從LP找到間距離巴士站不遠處嘅酒店。

13個幾鐘嘅長途巴士，係1930到站。當巴士進入長途巴士站範圍，即時有幾十人圍住架車，好似警察護送香港惹火高官座駕，免被示威者衝擊一樣。直到巴士停下來，我是車上唯一外國人、又坐窗口位，當然一進入車站已成為眾人目標啦！D人係咁係車外China, China咁叫，真係煩死人⋯ 係車上記熟地圖，再問清楚酒店方向。當我一落車，即被當地人重重包圍及吶喊China,china。我於是左衝右閃，有如常山趙子龍如入無人之境，最後輕易衝破這些嘍囉，往北面酒店方向絕塵而去。

到達首都先去醫院，放低個唔舒服乘客

穿過巴士總站旁嘅油站，到達一間快餐店。餓了咁耐又無痾到，應該飢饉完畢呱？叫了漢堡包外賣後，便繼續往酒店方向前進。

沿黑暗嘅街道些上行走，約十多分鐘，前面突然重見光明，原來就是酒店位置嘅購物中心。一入酒店，reception報價竟然$129-USD連早餐... 即時呆左，話諗吓先便離開。我真係唔敢相信，非洲住成千蚊一晚嘅住宿？但諗諗下身體太虛弱了，住就住吧⋯ 

一入房真係好唔錯，係正式酒店嘅格局，插蘇都為旅客而設嘅世界通用萬能插頭。由於太肚餓，即時食外賣先，飢饉完畢！由尋日下午3點到依家晚上8點只係尋晚食了兩塊餅咋，計吓先⋯ 哎呀! 原來29個幾小時，唔夠30添，功虧一簣，唉⋯ 我這個飢三十，加上陸路橫渡非洲，應該十分夠噱頭抓到贊助呱？可惜我唔係甚麼人氣blogger唔出名啦⋯ 

不過講開依家網上突然多左好多旅遊達人、人氣blogger，原來好多都只是淺嚐熱門幾國，有個甚至只靠工幹出trip去過多國就話達人。有時見有朋友係臉書分享，我都對文章有興趣而留過言(認同佢所講嘅留言)，可惜都無回覆，而個blog內基本上亦毫無留言，他回覆留言只限於臉書專頁。從港女這個曾經是半個傳媒人得知，這些只是靠點擊率高來賺取廣告收入，所以網絡上突然多左好多濫竽充數旅遊文章。好似我曾經去過嘅粉紅沙灘就經常出現，真真假假，真係老友係臉書分享，我先至會費神解釋事實。有時港女都講我更有潛質做人氣blogger，可惜我為人較為低調，哈哈~ (係度自Hi) 不過百貨應百客，有需才有求，網上世界都係不必太認真吧~

食完外賣飲埋剛才買嘅飲品，飲咗大半才發現係奶類飲品。唉⋯ 我飲奶會肚痾架。希望無加重病情吧⋯ 食飽飽，不知是否個人安頓下來心情放鬆，連括約肌忍左咁耐都想放鬆，又解放低幾兩。沖乾淨涼、Wifi上吓網，就喺非洲一千蚊住宿好好瞓一覺先~

reception及用餐大堂

雖然酒店話水喉水合乎世界標準⋯

以為是果汁，原來是奶類飲品⋯

呢兩日瘋狂移動，三爬兩撥就差不多到橫渡左一半LU