Day 13 期待(贊比亞Livingstone)

(Day 13) 2015-09-23

住宿：Jollyboys Hostel

行程：Livingstone 

8點幾起床後，又痾左一次，自尋日到埗後再無食止痾藥了。梳洗時剃乾淨留了多日嘅鬍鬚先，靚靚仔仔準備聽日接港女~

梳洗後去Hostel內一站式嘅酒吧餐廳，又食all day，見仲有肚痾，點了個素食all day $30-瓜柴($24-HKD)。唔~ 好美味，真係有水準~

早餐有兩款，我選擇了素食

早餐後到休憩區無所事事咁hea吓，認識了新加坡女仔叫Jessica，係新加坡做社工的，一個女仔放了個長假來非洲流浪。吹左好耐水，又係講旅遊，仲有大家生活嘅地方，仲有李光耀。不過傾到於非洲嘅體會，也有一個同感，就是從前媒體、人們口中講到非洲幾咁危險，始終自己親眼所見先為實。佢話自己隻身去過三次印度，邊有報導講到咁危險呢？我跟每一個來非洲流浪嘅浪人傾談時，對非洲感覺非常一致。大家都話出發前只聽到非洲好危險，現在可以有自己嘅所見所聞~ 所以早前香港發生好多重大事件，真真假假，我自己都只是從媒體看到片面之詞，寧願唔講了，講埋一份，被人利用左都唔知。好似美國講到古巴、伊朗係恐怖分子溫床、邪惡軸心一樣，去過嘅朋友應該好清楚了。

一吹就吹到11點，Jessica換上三點式享受住宿內嘅泳池。我就plan定會合港女後有乜嘢係必需做，維多利亞瀑布這一帶算是逗留得最耐嘅地方，約一個星期，淨係Livingstone都留4日，因為實在太多活動想玩了~ 我聽日先接港女，再留多兩晚。港女到嘅第一晚佢已Book定一間正住宿來享受一下，而我就於Jollyboys book了間茅屋仔作這裡跟港女最後一晚嘅住宿，$45-USD。

跟住睇吓reception旁嘅活動報名中心，這裡有好多File，內裡都有好多活動嘅詳細介紹，如價錢、時間等。港女於香港一早上網book好了一個博茨瓦納國家公園嘅Safari，跟這裡見到嘅價錢一樣。這裡咁多野玩無理由今日無野做架，於是報了個Victoria river sunset Safari with snak & drink 1600hours pickup $100-USD。 後來再問埋住宿內廣告所見好吸引嘅Microflight，$170-USD只得15min，這個無報，等埋港女來到再商量。這裡活動眾多，看來要破產了⋯ 

吹水區

左：有得做Sap
右上：住宿有埋泳池
右下：用餐區或吹水區

報了Victoria river safari

維多利亞瀑布位於四國交匯處，鄰近有多個嘅國家公園，所以淨係Safari都有好多選擇。加上有上述提及過嘅Microflight微型飛機，仲有笨豬跳、激流、參觀維多利亞瀑布、漫遊上游下游嘅風光等等等等等，認真玩真係半個月都唔夠呀~ （港女按：仲有沿瀑布嘅火車trip咖，不過夾唔啱時間。）

跟港女whatsapp，佢話一陣收工後都剪個短髮Look來非洲，香港時間今晚就上機啦，好期待帶港女認識我所認知嘅真正非洲呀~

打到呢度，攞部電話出嚟睇返當日對話嘅內容，真是滋味在心頭呢~

依家中午未到黃昏Safari，出去行吓順道睇埋聽日嘅住宿先~ (這些大型Hostel往往令人懶洋洋唔想外出) 因為瞓醒要搬嘛，無謂攞住咁多野行冤枉路啦~ 沿大馬路行落去大約15分鐘就到，期間路經油站又3,4人推架私家車入油站，我見非洲人咁友善，即時跑去幫埋一份先~ 

聽晚嘅住宿係港女book定嘅，視察過外圍好似好唔錯噃，而且隔離就係小型購物中心添。係超市買了水、漿糊筆；也到Hungry Lion快餐店食了炸雞$22.9瓜柴($18-HKD)。

左上：旅客中心
右：嘅博物館(諗住等埋港女先去，可惜最後都無去⋯)
左下：用垃圾做嘅大象藝術品

沿大馬路行

聽晚港女book定嘅住宿

鄰近購物中心及銀行

炸雞幾dry

回到住宿又有點C意，去一去廁所⋯ 終於回復正常啦！ Yeah~~~~ 之後寫吓遊記，也用剛才買嘅漿糊筆做勞作⋯ 即係將之前嘅巴士飛、入場券等值得紀念嘅野貼落本寫遊記嘅記事冊度呀~

黃昏河流歷險準時1600時出發，有個旅行社職員揸住架Hiace貨Van來接我，之後再要去埋其他住宿兜埋其他遊客，其中一間住宿離開市中心，但就好豪華嘅感覺，看來價錢唔平喎⋯

等到呢一刻，背了半個行程嘅長炮傻瓜相機正式出動啦！今個行程相信要影唔少動物，如買支望遠鏡頭雖然照片質素有保證，但十分昂貴，加上重量驚人。心裏盤算自己影相唔係追求極高質素，而是較著重照片背後嘅故事。所以買了部Canon G3x長炮，有成25 倍變焦，等於600mm，夠影野外動物有餘啦~ （港女按：有無廣告費幫補吓？）

貨Van車我地到河邊嘅一個碼頭，車上全部遊客參加了另一個Safari，隨即上了一架大船。只得我一人在另一架小艇上，好似好孤獨咁。心諗，唔通我獨霸這小艇？無幾耐，我嘅團友到喇！有大有細約十個八個人。他們是一個墨西哥家庭，來非洲旅行。當知道我都去過墨西哥後，多咗好多話題，向我問長問短咁，佢地成家人都好Nice呀~

一到達碼頭，即時聽到咚咚聲嘅非洲音樂

我坐係下面嘅艇仔

兩位好友善嘅導遊

開船往河中前進，看到剛才其他較大嘅船有自助餐，有D有BBQ，香味從燒烤嘅濃煙傳過嚟，有D葡萄佢地添！不過原來我地都唔差，有成個冰箱嘅飲品任飲，早D攞出嚟嘛⋯ 全程慌死蝕底咁隊了可樂 x 1，Tonic x 3，白酒一杯，Wakaka~~~

職員講解了一陣，便開始帶我們尋找動物。當船開到河中心，我聽到身邊忽然Sa一聲，嚇了我一跳！見到河馬鬼鬼祟祟咁露咗半個頭出水面，瞬間又潛返入河中，我不禁好大聲咁嘩了一聲。此時整個墨西哥家庭真係打數都無咁齊，同一時間望向我⋯ 咁我話係我First time野生捕獲河馬嘛，哈哈~ 之後仲有大象、猴子、各種鳥類等⋯ 不過我始終覺得河馬最鬼馬，成日好鬼祟咁只露出隻眼出水面來𥄫我地~ 由於我地只是一部艇仔，可以更靠近動物，果然無揀錯！後來見有人開白酒，我又唔蝕底咁一齊飲，沿住非洲嘅原始河流上漂流，嘆住杯冰凍嘅白酒來享受，真是人生一大樂事呀~

行程尾聲係日落時份，登上一個河中小島享受小食。上岸前先由職員登島視察一下環境，看看有否其他猛獸在島上，佢話動物會游水周圍去的，而我們休息嘅位置就有不少大笨象嘅糞便了。職員拿出到會，我又唔怕蝕底咁係咁食，務求食飽D當埋晚餐慳返餐，話晒這Safari俾咗成百蚊美金喎！一邊食一邊欣賞日落，加上剛才飲了些少酒，感覺到夕陽醉了~

都係河馬Q D～～～

回程時穿越一處翻滾嘅河水，極刺激咁拋左兩吓後，小艇就到達河邊一處大型酒店，墨西哥家庭就住在這裡，臨離別前他們每人都要求同我影張相，我也跟他們來張自拍大合照吧~ 這大型酒店在河邊，應該又是十分昂貴，這墨西哥家庭真係有錢。

Safari完畢，又係同一個職員揸同一架車車我回住宿。司機好nice，問我好唔好玩咁，落車後完全無問過我收Tips，真是太好了~

返到Jollyboys沖涼後又睇Rugby。剛才係咁食諗住今晚慳返餐，不過點都係肚餓，食了三文治$35瓜柴，啤酒$10瓜柴。

臨瞓前去收衫，發現唔見了條長褲，這條行山褲著左成十年了⋯ 於是攞埋電話來照明尋找，其實晾衫位得幾條繩，又無乜人晾衫，搵唔到。只見到地上有小強，好恐怖⋯