Day 9 接機(俄羅斯莫斯科)

(Day 9) 2012-03-17
住宿 ：Pyjamas Hostel 忘記價錢

行程 ：愛沙尼亞Tallinn --> 俄羅斯莫斯科

波羅的海寒冬指數 : -2℃

一早0200起床,瞓左三個鐘咋! 起身擦牙後,即時食尋晚係超市買返黎既麵包同橙做早餐先~ 0235即刻起行,要趕0500既機呀!

尋日睇睇地圖,去機場同去Old towm原來都係一樣遠咋! 只不過反方向行,於是尋晚已決定步行去機場; 半夜三更,係條無人既大街急步行去機場!

其間越行越熱,行到成身”慶”合合,於是一路行一路除帽，頸巾... 仲諗住半夜會好凍,但就無計算埋有負重加上有咁大既運動量... 等我仲著埋今個行程第一次著既”虧佬褲”Tim! 唉...攪到身水身汗!

行到中途,差D比一座貌似客運大樓既Building坤到,諗住用I pad睇睇offline 既google map,點知係街邊都痴到店舖既free wifi 喎! 呢度既wifi真係方便,我極少係條街上見人篤部機上網既! 當地人跟本就唔使join上網plan!

打呢篇BLOG時,近來成日都報導,話美國正計劃全國佈置免費Wifi網絡喎... 我諗香港既地產霸權,有排都唔使指意做到!

http://www2.chinese.net.au/navigator/oznews/25214.php

由住宿步行去機場,約半小時路程就行到啦~ 到達機場差不多空無一人,睇黎我太早了~

@0315

Check in

時,個地勤又質疑本特區護照，以為係中國護照去俄羅斯要Visa, 由於我幾日前又出完境又入境,翻開有印果頁佢睇,即時”秒殺”左佢！哈哈~

離境去到passport control 時,差d 攞錯本特區護照出黎,(因為我係用BNO入境的), 當時個關員都攞定個印,我即時出示返BNO,比個關員見到，就問點解我有兩本Passport,同佢解釋兩句後即時放行~ 如果用特區,真係可能又有排攪Lu•••
機程個半鐘到達莫斯科Vnukovo機場,俄羅斯免簽當然用返特區啦! 唉•••緊係又"Kick"啦! 個關員一見本特區就皺眉頭,又打電話係咁問,又用部紫外線機每頁慢慢照... 心諗上個禮拜先黎完仲有蓋印咁都唔信!? 真係火滾! 攪左好耐好耐,佢最後又咪放行!!!不過佢好好人咁幫我用電腦打埋入境form,唔使自己寫~
我唔會嬲人地,因為佢真係唔識分別! 怨就只會怨自己香港,香港呢個百年老字號,竟然被世人所遺忘••• 不過當然有讚既！經常有港人出入既關口,職員咪識分囉~ 好似一到步時既莫斯科SVO機場咁!

原來我著住對鞋既牌子都係間航空公司黎架!

又沿熟悉既路返Hostel,莫斯科又落雪啦~ 返住宿前食D野先,返到Hostel沖完涼上左陣網就上床瞓Lu...
@1400





1700瞓醒後好肚餓,今次黎到俄羅斯,好想搵返去哈薩克時食過既”混文”,混文係碗湯麵，有羊肉，蘿蔔，薯仔等配料,好在有wifi，即時用I Pad上網去我既網上相簿,Show比Hostel 既當地staff睇,不過佢都好似未食過咁••• 但係就介紹左間俄國餐廳,話既Local 又便宜喎~ 我諗呢種食物係中亞既美食,雖然哈薩克曾經係俄國一部份，不過始終係遠東地區，近歐洲既莫斯科人真係未食過都唔出奇。

出到門口見有太陽,即時返轉頭攞腳架,因為餘下一星期既天氣預測都係烏雲密佈,諗住用僅餘既時間影紅牆Magic moment~
去到介紹間餐廳叫"My My"好大間,裡面以香港幾餸飯咁,不過就多幾陪食物選擇,先係冷盆，烤肉牛排，熟食,甜品飲品等等幾十種!!! 並且明碼實價列出來,價錢亦合理~ 我叫左個冷盆(以為係中亞抓飯),烤雞同野飲,盛惠$286-RB = $70-HKD 好飽好好味~ 係莫斯科算係平架啦！

食飽諗住去紅牆,點知落錯車,行左好耐都未到,一陣仲要去機場接人機,唯有走喇! 睇黎同好天既紅牆都係緣慳一面Lu... 明明就看到，還是欠幾步•••



於是又地鐵又車咁去機場,地鐵今次一次過買左十程既票,唔使次次買咁煩,一次過買每程仲平左$0.5RBTim~

去機場程巴士塞車遲到，好在人地班機都Delay仲遲! 呵呵~ 去接機，好以我住係莫斯科既當地人咁呀！　由於女友坐黎班機係由北京飛來，所以同好多內地同胞一齊接機～  

呢班機過既乘客過關特別耐，連遲一小時係瑞士來既航班D乘客都出晒黎！　拿好接機標語等候，由於真係等得太耐，有個D內地人不停依依哦哦，真係唔煩都比佢覺到煩呀！

接到機後，女友惱氣沖沖話D內地人都唔排隊，見有D朋友係隔離隊排前D又走過去，就係咁條隊就好似排極都唔行咁，當然關員檢查中國護慢都係原因之一啦！　不過我早前都係同一班機喎，都無咁既情況既？　可能呢班機多內地旅行團呱（接機時睇到），而我早前搭黎既就無團

返Hostel當然係搭巴士再轉地鐵啦；早前女友成日話上網搵資料時D人一定要搭機場快線，不過就算搭快線都一樣要再轉地鐵；當一出到室外我就即時指示係正門口既巴士站，幾方便！未出過遠門既女友終於信服我唔需要搭貴十幾廿陪既機場快線啦～　係囉～　去旅行要有自己既風格嘛～　於是係車上，我好似住左好耐咁介紹莫斯科,查實我都係留左莫斯科兩三日咋~ Hehe~

去到地鐵站啱啱趕得到尾班車，不過尾班車有D醉貓嘈嘈閉，唔理會佢地就無問題~

今晚都係住返第一晚既Hostel,不過今晚住既係雙人房,其實係4人房,因為仲有張碌架床,但就計我地雙人房既價錢~


地鐵一角