Day 11 淡季有著數(俄羅斯Suzdal)

(Day 11) 2012-03-19
住宿: Gostevoy Dom $1900-RB = $480-HKD
行程 ：俄羅斯莫斯科 --> Suzdal

今日離開莫斯科,要去係俄國行程裡好想去既一個地方,係金環既一個小鎮Suzdal~ 最出名就係全鎮都係用木造既建築物!

0830起床,咪咪摩摩，攪到1015先離開Hostel!根據書中顯示,先搭地鐵去3號線既總站,其間要係5號環線轉車,超多人呀!!! 我地又一袋二袋,比人係咁迫,夾硬迫入車箱,車廂內好似迫到沙甸魚咁呀！

Hostel內既攪鬼提示

Hostel所在建築物既門口,可想而知我最初幾難搵呢!!!

去到3號線既總站,先醫好個肚,食左件漢堡物體,但係港女(比較親切來形容女友)就叫左個薯蓉,薯蓉上可以加多種醬料(好似每樣計錢),今次加上芝士,十分美味~ 薯蓉又飽肚,真係啱晒我呢個大食仔~ 而且價錢比市中心平好多~好滿足~ $250-RB = $60-HKD(2人用)

食完再係附近既麵包店買左幾個麵包,一陣係長途巴士食~

根據旅遊書作者所講,搭巴士去Suzdal係有兩種選擇

一) 就係坐巴士去Vladimir,再轉車去Suzdal

二) 就係搭前往Ivanovo既巴士,路經Suzdal既公路旁落車

旅遊書作者建議不諳俄語既遊客應揀第一個方法,而經常信晒旅遊書及網上討論區既港女,當然選擇第一個方案啦... 我就話佢米鬼成日信晒D討論區同書啦,要信自己嘛! 明明有一程車去到,點解要轉兩程車去咁憨居呢? 最後佢當然信我選擇左第二個方案啦~

12點去到巴士總站買飛,可能走左班車,只買到1300開出既巴士,每人$356-RB = $90-HKD


巴士總站


路線圖,複雜吧...

放大右下方既第三條淺藍色,就係我要搭既路線啦~

呢程車中間經過兩個大巴士站,可以落車伸展下,而且拎住巴士飛，去廁所就唔使錢,否則當然要比入場費啦~ 停既其中一個站,原來都會停第一方案所講既Vladimir喎!

係一個站停下來休息期間,車上有些俄羅斯人真係好熱情,雖然言語不通，但係大家都好努力用身體語言溝通,又主動同我地合照，估唔到觀光客會變成景點~


下圖就係Vladimir站

經過4個半小時,到達Suzdal,由於我地架巴士唔入Suzdal市中心,所以要係市郊公路落車,落車之後就望住最高既教堂進發,(因為最高既教堂係市中心),沿路都溶緊既冰，成幾寸厚,真係寸步難行! 連手拖既背囊都要抱住黎行! 而且仲要時刻留神,避開突然係馬路上被車展過既污水!!


呢個悼念車禍既十字架,就係公路既落車位置



Suzdal既俄文,沿路一直行,一直行...

本來上網搵左一間木造旅館,同我以前既方法一樣,無book到,只係cap左個地圖,跟住黎搵; 因為雪地行走,幾經辛苦行終於到去，但竟然摸門釘（！）
嘗試去另一個位置呼叫，係間屋既外圍,雪白既蕞叢林中仲比我見到一隻啡色貓頭鷹添~
攪左一大輪都係不得其門而入，唯有行返轉頭,港女當然黑晒面啦,話我點解唔book定... 哈哈~

尋日上網時選定呢間住宿,係因為佢近住條河,相信風景會好靚; 其實早前係市中心沿途都路經幾間住宿,諗住行返轉頭再搵過,好在行左五分鐘，係同一條路既街角見到一個寫住俄文Dom既牌既木屋,因為港女係翻譯員,職業病鍾意研究吓D文字,知道要來俄羅斯旅行,當然一早了解一吓俄文啦,係佢先估到係一間住宿咋!
於是姑且按門鐘來碰一碰運氣,有對四,五十歲既夫婦出黎應門，佢地唔識英文,經身體語言後,我估佢收費$1900-RUB一晚,經電話按出數字比佢再三確認,成交! (即港幣500有找)


其中有個Dom字既木牌

一入屋,已感覺超正,好有家既感覺呀~ 所以我一直都好鍾意住民宿架！成間屋用木做架,D傢具大部份都係! 我最鐘意木造既傢私,尤其原木果隻,有種Natural既感覺,當年我新居入伙,就特登係老遠既海怡半島,用幾千蚊買左一個雜物櫃呀！其實好貴(我覺得)
於是女戶主就一輪咀,用俄文,九唔搭八,指手劃腳咁講左一大輪大家都唔明既野,我估係介紹屋內設施,聽朝應該仲有早餐食Tim~ 介紹完，佢好放心咁俾左成間屋既條鎖匙我地,原來我地只係用港幣500蚊,就獨霸晒成間兩層既木屋呀!!! 連廚房都可以用tim~ 住呢間木屋好wram我好鍾意呀~

後來返到香港上網搵呢間民宿既資料,原來租成間屋既費用要成$316-USD,即2400-HKD架!!! 依家淡季,只需用5分1既價錢就用租晒成間屋,所以我鍾意淡季去旅行就係咁解勒!

關於呢間民宿既當地酒店網

http://en.renthome.ru/rentals/rossiya-vladimirskaya-obl-suzdal/37144/


全間屋我玩晒,Yeah~


我間房~

浴室

二樓客廳

地下廚房,廚具都一應俱全

地下飯廳,今晚係度開餐~

原本諗住係Suzdal留一日,就玩下一個城鎮,見到咁正既住宿,即時唔使諗! 住夠兩日啦~ 我呢種遇到鍾意既地方就隨意留多一兩日,唔鍾意就到此一遊快快走既旅遊方式,慢慢解釋同比港女去領會,總好過每日plan死去邊去邊咁刻板丫~
安頓好行裝，見廚房既廚具一應俱全,就出超市買野煮飯仔,並且沿途影吓相~

係超市買左長通粉、煙肉、意粉醬、魚子醬、蜂蜜酒(Suzdal特產)、紅莓味vodka、可樂、茶葉、乳酪、橙。。。都只係$883-RUB = $220-HKD




超市掃貨


是日晚餐!!! 啡色果支就係Suzdal既特產蜂蜜酒,原來第二度無得賣架!!!