Day 3 續遊南法(法國普羅旺斯)

(Day 3) 2015-04-03

住宿：Ibis Hotel

行程：Gordes —> Fontaine de Vaucluse —> Avignon —> Orange

可能房間太舒適，瞓到唔想起身，而港女一早已起床並走左去食早餐了。我瞓到0900時起床，於食早餐處會合團友們，港女們對酒店既早餐讚不絕口，話係香港根本無可能食到喎！我於是都一於嘆吓法式早餐先～ 至於點讚不絕口，銀仔牛"趙"牡丹點識形容得咁入神吖，當然由港女來描述：上一次中美洲之旅，食continental breakfast食到怕，今次喺歐洲點都會好啲啩。一上到用餐區，就見到一本古巴封面嘅《時代雜誌》（英文版），當然要扮吓嘢，一邊飲茶一邊睇書啦。

先講飲品，酒店提供一系列茶包，earl grey都有幾款（如原味、煙熏味）、綠茶、白茶等等，俾埋茶壺你泡。仲有橙汁、雪梨汁、西柚汁，咖啡... 剩係試勻晒啲飲品都要飽咁一半。食物方面，有香港賣緊起碼10蚊嘅鬆軟牛角包/朱古力scone、煙三文魚／salami cold cut、芝士、乳酪、乾果（有我最愛嘅杏脯）、蘋果茸、cereal... 愈數愈肚餓喇！！天呀，睇返啲相就好想再去，剩係食個早餐都願。

酒店大廳

check out結賬時望一望匯率apps $1:€8.2，比出發前去銀行換時1:8.4平得多，當然碌卡啦~ 之後由於匯率問題都成日碌卡，最後剩返大量歐羅。

離開住宿後再次去山上嘅城堡參觀，但發現要4月10日先再開。不過無所謂，有時遠觀仲好過入去裡面睇。城堡隔離有同樣由石砌成嘅醫院，如果唔睇門牌都唔會估到。

早前團友Ellen話postcard上有一處景點好靚，叫Fontaine de Vaucluse既地方，一於出發前往。駕駛時發現，自昨日偏離主要幹線進入山區小路後，道路不及幻想中闊，仲窄到有點得人驚，要小心翼翼來駕駛。

得閒再影架車；左上：標版中間嘅螢幕
左下：是入油渣的

路上再與昨晚同住宿嘅古董車相遇

路上風光

路上風光

到達Fontaine小鎮，於露天停車場泊好部車，一直猶疑要唔要入錶，咁啱附近有一團遊客，就問吓個導遊，原來係免費。沿河邊的步行小徑20min就到。沿途有紀念品店，港女們喺雪糕店瘋狂試食，最後每人揀咗三球，一邊食一邊讚不絕口。€4有三球人手製gelato，港女話返到香港唔再扭食”哈根大師"喇。店主知道我地係香港人就好興奮，話一直都好想去香港玩，不過啱啱生咗小朋友，要等BB大啲先。佢仲話鍾意一個叫Wing嘅歌手，講咗好耐都唔知佢講緊邊個。港女返嚟再查，原來係一個唱歌好難聽嘅紐西蘭籍華裔大嬸「曾咏韓」，估唔到佢都幾重口味。

水泉好清，但就無Postcard見到咁靚，可能角度問題。

由於團友們早前買的電話卡唔work，於是回頭問吓雪糕佬，睇睇有無計仔。可惜攪咗好耐都係唔得，思疑被賣卡個職員呃。

去到Avignon，但塞車塞到爆影響心情，加上環境破落(可能未到市中心)，咁啱經過SIM卡電訊商，由於高Ling早前買了當地電話卡上唔到網，當然珍惜這機會問過究竟啦。但等咗好耐先問到客戶服務員，發現賣卡個職員無入到買數據嘅密碼，而家只可以打電話。如果想上網就要再俾錢，結果放棄走人！

話說港女尋晚叫酒店職員book了松露大餐，以為喺Avignon，點知擺烏龍，結果喺麥當勞問人借電話打去取消，係咁講sorry。雖然佢地話唔緊要，但我地失望之餘亦認真唔好意思。回想出發前網絡上瘋傳，港人去日本預約用餐而放飛機嘅惡行，唔想自己都做埋害群之馬。

去Orange城，十多分鐘車程到達。Orange並不是英文的橙嘅讀法，法文叫”哦康廚”，亦唔覺有橙樹。Orange城鎮不太大，有幾處古蹟。首先找到間網上評價好好的連鎖B&B，但客滿，所以轉去就近的ibis Hotel，€77($650-HKD)一間雙人房。

晚餐步行去市中心15min，搵唔到職員介紹嘅餐廳，唯有求其入一間。又食法國大餐€34($287-HKD) ，雖然可以對正古跡食飯，但今晚嘅食物就比尋晚遜色得多了... 不過仍然係食咗兩個鐘。

回住宿時見地產舖嘅廚窗廣告，Orange市內嘅Apartment只需萬零歐咋! 如獨立屋先幾萬歐，計埋匯率都咪話唔心動!

路上風光

頭盤

主菜

甜品