Day 1 眼光光(羅塔島)

(Day 1) 2014-01-04

住宿：Sunrise Hotel (平房)

行程：HK —> 關島 —> 羅塔島

收工返屋企食完阿媽煮既飯，就一家三口出發前往機場會合港女； 去到機場得知登機口又係上次去西伯利亞攪到趕頭趕命，位於北衛星既Gate 508，都不禁苦笑⋯

上機前煙剷既兩老，係Duty free買了足夠既精神食糧，就趕住去登機Lu~

選乘美國UA直航去關島，初次去美國地方，感受到繁複既保安檢查，亦都感受到複雜既入境手續! 係機上職員派既入境&海關表格都三份，最慘係我要幫埋兩老填嘛⋯

五個小時既機程，瞓吓醒吓無覺好瞓； 今次第一次搭唔長唔短既夜機，感覺仲衰過搭十幾個鐘去歐洲既夜機呀!! 因為長途機都起碼有十個八個小時你瞓；但今次呢程，起飛穩定後派餐，降落一小時前著燈，所以實際無人打攪既休息時間只得個零兩個小時⋯ 

係當地時間0530到達關島，天都未光唯有係機場Hea... 見又無覺好瞓，心諗會唔會難為了兩老⋯ 好在阿媽話，挨夜有幾可吖~

關島天氣當然係熱啦! 同香港現時得十度八度成強烈對比! 老豆就最Like，成日話係香港凍到手指曲喎!

係機場食早餐，兩個餐三樣飲品，盛惠$20-USD，食完早餐頂唔住，要休息吓先⋯

成個早上就係機場流連，因為等中午轉機去羅塔島Rota Island; 我這個安排同玩左關島先無乜分別，因為清晨到步，酒店都無得Check in，挨左晚夜都無力玩，所以一樣係度等⋯

係機場敵不過睡魔，倒下了，瞓醒見爸媽仍然無瞓過，真係勁！

關島旗最下，羅塔島屬北馬里亞納群島係右上

去羅塔島呢程係螺旋槳飛機，港女第一次坐咋~  大家剛瞓著，機長就嘈冤巴閉話降落啦... 機程25分鐘，真係張櫈都未坐熱呀！呢程機來回要$2000-HKD，真係去搶!

到羅塔島啦～

羅塔島Rota Island係美屬北馬里亞納群島南面小島嶼。

一出到機場有個年老既婆婆揾港女，原來係屋主呀，叫Jackie！ 真係估唔到會親自來接我地! 於是先租車，全羅塔島只得兩間租車公司，Budget 同Islander; Budget就一早係關島問過話係羅塔島所有車已租出，於是只得一個選擇,就係Islader; 租車時經Jackie同職員講一句後，自動平$5-USD一日，真係太好了~ 最後用$60-USD per day連保險,租了兩日~

羅塔島機場，下圖係聖誕佈置～

由Jacky帶路，先去佢經營既另一個住宿check in, 原來佢經營既住宿好正架！ 一大片椰林中有數間屋仔，Jackie仲叫我地住呢度tim! 但我想先感受一吓小村既風情~ 臨走前見遍地椰子，攞幾個來影相之際，個職員即時開比我地飲！ 嘩！！！ 真係正！ 香港超市都要賣成十幾蚊個，就咁飲左差不多$80蚊港紙啦！ 羅塔島D椰子就一地都係無人要...

銀仔第一次成30幾度見到聖誕佈置，感覺格格不入，哈哈~

約20分鐘車程，到達位於Songsong Village 既住宿，係一間簡陋三房大平房，比係剛才Jackie大本營，真係差好遠... 於是更改聽晚返佢大本營住一晚，Jackie即時話，一早已叫我住佢營地啦~ 哈哈~ 住佢營地仲平D tim~ 

安頓好，即時醫肚先，去左間餐廳叫Pizzaria食野，叫左三樣野連超大飲品，$60-USD，D炒野，兩老勁Like~ 

@1530

食完悠閒吹吹水~

食到好飽，就去附近既景點、碼頭、Wedding Cake Mountain、荒廢製糖廠⋯最後係海邊欣賞埋日落就返住宿Lu~



去之前睇過地圖，點解Wedding Cake Mountain個地名咁得意既？ 一定要睇吓! 所以連住宿都選擇這裡~

狗狗也愛椰子~

全島經常見到既哈哈笑

上圖：Wedding cake mountain，似嗎？

荒廢的日本製糖廠

日落與晚霞~

媽咪第一個沖完涼，就全程坐係門口，一面煲煙飲啤酒一面食欣賞星空，羅塔島既晚上涼快，睇黎好enjoy噃~

我同港女沖完涼，開車去有Free Wifi既Leadership Park 上網，呢度係個公園中既涼亭，似係當地居民既免費網吧多D~ 大人細路嚟睇片check email... 

上網後再去影星，去左Wedding Cake Mountain既半山影，叢林中影到有D膽顫心驚Tim...呢度既星比蒙古多，但就無蒙古影得咁靚!

行程