Day 13 旅遊討論區(俄羅斯莫斯科)

(Day 13) 2012-03-21
住宿 : 火車上
行程 ：Suzdal-->莫斯科



0930瞓醒望一望窗外,無論泊起路邊既車,植物都鋪滿一層厚厚既積雪, 雪•••原來從來都未停止過!

每家每戶也忙著剷走門前既積雪，我估生長於嚴冬地區既成年人，會憎恨落雪的!

食完屋主為我們準備好既貝殼粉,加埋尋日食淨既魚子醬早餐之後,就由男主人車我地出巴士總站搭車返莫斯科啦~ 男主人好Nice,而且仲路經郵局幫我地寄埋postcard Tim~


認真睇尋日買既好似唔係真正既魚子醬



港女臨走前用俄文寫比屋主既道謝信,寫到似模似樣,果然係研究語言噃

郵局

去到Suzdal近公路旁既路口就係巴士總站啦~ 即日前係公路對面落車既地點不遠處。 由於剛走左班車,仲有大半個小時,所以係仍然落緊雪既雪地玩拋雪連環快拍,有個人唔知係咪智障,拋幾次都唔成功! 哈哈~




去Vladimir車程要45min($62-RB = $14-HKD)到達Vladimir時剛好趕到1300開往莫斯科既巴士。$350-RB = $90-HKD


係Vladimir巴士站外既黃屋仔,就係買飛往莫斯科既地方
三個多小時既車程,1600係莫斯科環線既Kurskaya站附近落車! 呢度同我要將要去既列寧格勒火車站原來只差一個地鐵站咋！於是即時前往,列寧格勒火車站外圍好有前蘇聯既氣勢! 係車站內買去芬蘭既火車票時由於言語不通好阻滯,比人點到第三個地點先買到,仲要唔接受Credit card,只收盧布! 我身上又無咁多盧布,唯有即時去找換啦! 於是買了今晚2250開往芬蘭Kouvola既火車飛。

($3600-RB = $900-HKD)


搭地鐵時次次都去櫃台買票,鍾意探索既我一於試吓售票機先~

列寧格勒火車站

目的地係芬蘭邊境城鎮Lappeenranta過一日,我並唔係貪心話想去多個國家,而係避免係俄羅斯逗留超過7日,而要去移民局做Registration咋...因為我對做Registration有陰影呀！(當年係哈薩克,有興趣自己睇) 再者可以玩多個唔同風格既城市~ 講開Registration ，聽講俄國都唔係點理，但我早前係D前蘇聯既國家，一樣有呢D條文，就有一個好不快既經歷，當年我又真係無做registration而唔比離境，眼白白睇住自己班Flight飛走••• 當然呢D無厘頭規矩係前蘇聯定下! 今次來到元兇既俄國，見過鬼仲唔怕黑牙！ 而我又極唔想同D黑暗差人打交道，於是揀左一個芬蘭邊境小鏡離一離境係一個好選擇，又可去多處地方,一舉兩得~
呢個話題又不禁要提吓港女！佢好鍾意係D討論區搵資料，有人講開係俄國Registration既問題，竟然有人扮晒專家回覆話[唔使做registration都無問題，都無人會check既•••] 嘩！真係咁答跣人都得既!!! 人地俄國有明文條例規定，逗留超過七日既外國人統統都要去移民局做登記的！當地關員唔check一回事，點知佢幾時C屎痕揸正黎做屈你錢架！你知真係有人當D討論區神咁拜架嘛,害到人就無謂喇! 回覆人都要講返個利害關係比人知,等人地自己衡量吓丫!

我成日同佢講討論區可以參考,但不用太上心,因為”大雜燴”討論區真係乜人都有,唔似D全個都係講旅遊既討論區咁,有版主維持秩序; 係呢D大雜燴討論區裡,有人鍾意不停留言加積分;亦有人鍾意係不同post留言扮專家晒命,話自己去過幾十個國家,不停反駁人地既留言,真係身經百戰啦! 但轉個頭又問埋D新手問題,例如問係機場點樣出市區喎... 港女比我睇真係睇到O晒咀!!!

仲有D專家鍾意扁低人地,有人係討論區share遊記,比人留言質疑,甚至比人批評佢post埋D無深度既飛機餐,登機閘既照片tim! 唉... 人地咁大方share仲比人奚落,攪到Share個樓主極唔開心唔再寫... 所以我平時都極少睇呢D旅行既討論區!


買完飛,由於火車近晚上11點先開出,於是將兩個大背包寄存,每件$100-RB

@1700之後食左我係俄羅斯最鍾意食既焗薯,同係有Free Wifi既火車站上網,諗諗吓如果就咁就等到夜晚,咪嘥左寄存行李既錢囉! 所以仲特登外出行左個圈tim~
其實只係行左對面馬路個商場,好有國貨公司果種感覺;不過係底層既化妝部,有人貪到小便宜Tim! 哈哈~


火車站附近

 國貨商場

晚餐再幫襯返果間有焗薯食既連鎖店Kroshka Kartoshka,今次食三文治$75-RB去月台前仲懶淡定,慢慢去廁所刷牙洗臉,去到月台問左好多人,先解答到原來唔係呢個火車站呀!!! 望一望隻錶,已是2235,距離開車仲有15分鐘咋!!!
正當徬徨無助之際,有一個識講英文既當地男人,仗義幫忙
帶我地跑去係隔離既火車站,仲輕描淡寫講只淨十分鐘啫! 期間佢真係好幫手,係火車站沿途過D保安檢查,佢都用俄文同人好快解釋,令到我地暢通無阻趕到火車,仲送到我地到車卡Tim~俄羅斯真係超多呢D好人架! 今次衰在我太自負懶老定,好在無辣著隔離個港女啫! Hehe~當然最重要既係張火車飛好貴啦! 唔可以miss架!