撒哈拉之旅(三)

Day 5 -- 撒哈拉之旅(三)(突尼西亞)

住宿：被漫天繁星懷抱既撒哈拉沙漠中

食完晚飯後,又坐係帳篷外既坐墊,並由駱駝主人打鼓唱歌,亦有駱駝主人與團友們一齊跳舞,我當然亦有被親切既駱駝主人,同團友邀請玩左陣啦~

但跳左陣就好攰要坐返係坐墊休息,音樂聲,歡呼聲係寂靜,漆黑而又空曠既沙漠中,傳到無窮無盡既邊際。我當時有一種奇怪既感覺,就係好似成個世界只係得呢度先有燈光咁,好似全個地球只係得我地呢十數人生存緊咁呀!!!

個駱駝主人最後仲比左個鼓比我地玩,無音樂細胞既我... 與團友們當然唔夠駱駝主人打得咁動聽啦

大家玩左一陣原來已經十一點啦~ 大部份團友都瞓係一個大帳篷裡,而嗰啤德國團友問我瞓邊,佢話佢地會瞓室外喎! 其實我一早已經諗住瞓室外架,但係怕凍嘛… 佢話佢都怕凍,試吓如果凍就瞓返帳篷喎~ 呢個都幾好提議噃!

係營地既邊沿有兩座小帳篷,我就選左其中一個帳篷旁邊,能夠盡量擋住寒風既地方佈上地墊,地墊上再佈兩張毯,跟住我再蓋三張毯呀! 都算頂得順~

我呢個位置比團友既大帳篷較遠,在遼闊既沙漠裡,四顧蒼茫,就更加感覺到好似孤身一人在撒哈拉咁呀!!!

斗轉星移,月亮未到我入睡前已經落山了! 躺在被窩裡望住漫天既繁星,被美麗既星空看到呆呆出神,似是有一種牽掛呀!

覺得此刻好似嗰啤德國情侶咁,有愛人相伴,被千萬顆星星見證住,夫復何求呢~

起初聽住MP3,揀返D貼題既歌黎聽,天邊一顆小星星,海邊一顆小星星~~~~~~

後來唔聽歌來感受沙漠既寧靜,直到看到一顆好大好大既流星劃破長空,終於... 抵抗唔到睡魔! 係陣陣既涼風,美麗既星空陪伴下入睡了~

原來... 美麗既星空先至係最好既搖籃曲~

唔識攝影既我,這個壯麗既星空,只能留在腦海中...