Day 20(上) 公路旁的午餐 (納米比亞東北部)

(Day 20)(上) 2015-9-30

住宿：Buschfeld Rest Camp

行程：Dlvundu —> Rundu —> Otavi —> Outjo

行車里數：730km

Dlvundu 

起身食麵包、烚蛋、乳酪及即沖麥皮，還有經過了兩個國家、由贊比亞時酒店打包早餐時剩低嘅蘋果汁。昨日於超市買的麵包，好乾好粗糙、好惡啃，要一啖麵包一啖水先吞到。烚蛋跟昨日一樣，煲水時順道烚熟雞蛋，而滾水也可用來沖麥皮。早餐簡簡單單，簡單就是美。

吃過早餐便收拾行裝離開。日光日白看清楚尋晚嘅住宿，門面看似幾有規模，相信這裡除了營地，房間應該幾幾豪華咁款噃～（港女按：上網搵返呢個營地嘅網頁，見到有會議設備，唔玩露營亦可入住客房，睇相都幾靚咖。）

由於要追返路程，尋日車程非常長，相信今日都唔會短。於是係鎮內入滿油，入咗約$150-HKD/27L。

車上的糧食開始充足

雪櫃都有好多飲料食物，而透明蓋位置是冰箱

營地每個車位通常有條電柱給車輛駁電，這個工序由能源部大臣負責

將車頂關好後，便用下圖的鎖穩固

豐富簡單早餐

Rundu

上一篇提及納米比亞東北的古怪版圖，一直沿B8公路，長長嘅長廊還未走完。直至離開這長廊才慢慢看到小鎮。駕駛到近安哥拉邊境的另一個城鎮Rundu，只是兩小時車程，不知為何咁快又肚餓... 這裡有先進嘅購物中心，心動想買件Tee，最後都無買。（先前住宿時被偷嘛）由於還未有足夠嘅當地貨幣，美金仲有好多未換過，於是到一間銀行排隊。銀行內非常多人，條隊起碼二十人，而且等候多時也沒甚進展。為了爭取時間，便決定分頭行事。我排住隊先，由港女找尋其他換錢嘅地方。最後搵到一間找換店，內裡只得一個店員。有個好好嘅當地人讓我先，佢話佢換得多及有點複雜喎，真係好人。

有錢又身痕，便去超市掃貨，使咗$340-NMD($170-HKD)。於超市內看到有幾餸飯，便外賣來做午餐。

將物資放落雪櫃期間，稍不留神，雪櫃門拍落嚟，Boom一聲撞親額頭，痛死我，忍不住大喊了一聲... 用手摸一摸，再照鏡發現腫了細半隻雞蛋咁大個瘤呀！

Rundu市區

這是非洲玉米粉，買了一包

由於剛才駕駛時，不時看見公路旁有休憩處，通常都是四野無人。休憩處嘅環境跟路牌一模一樣，必定有棵樹及枱櫈，幾得意。喺超市看見兩餸飯檔口時，便想到買外賣於公路旁嘅休憩處食，必定有一番風味呢～

日間天氣雖然乾燥，但仍算炎熱。怕食物變壞，都係快些起程，沿公路前進，尋找休憩處吧。

無幾耐去到一個休憩處，停泊好拍些照片，便打開兩餸飯食。此時一群衣衫襤褸的小孩從遠處跑來，企定定眼金金咁望住我們。我也見怪不怪，還記得我於莫三比克時嗎？我當時什麼也無做，只是觀看當地人踢足球，不一會便有約二十名小孩駐足觀看著我。

於是港女從袋內拿了兩條soyjoy請小朋友分嚟食，但他們食完後繼續呆若木雞咁睇住我地進食，也有點唔好意思，想走又走唔到，於是極速食完走人。離開時已猜測他們會否從垃圾桶拾回殘餘食物來食，果然真是這樣。。。他們雖然衣衫襤褸，但個個精神飽滿，精力充沛，唔似飢荒無得食咁，唔通佢地對鄉間毫無味道嘅玉米粉食到厭？唉，無諗過會係較為先進嘅納米比亞會看見這些心酸畫面，當然，倫敦街頭都有機會看見⋯

休憩處跟指示牌一模一樣架~

剛才臨離開時，也有一位約十歲八歲的學生於公路旁行過。他走過來，開口問我地借筆。我當然知道佢唔係借啦，港女好樂意向他送上一支原子筆。現在港女也不時想起這小孩，不知有否善用我們贈送嘅原子筆呢？（港女按：開頭有D小人之心，估佢想攞錢，經過呢件小事，我對非洲嘅好感又更進一步。希望佢俾心機讀書啦，話唔定第日做咗名人，都會記得呢枝原子筆。哈哈。想起香港小朋友真係太幸福，自己細個讀書，咩文具都有，邊會諗到要硬住頭皮問陌生人拎。）

食完午飯，繼續沿B8公路行駛，由一路向西轉為西南。漫長、荒蕪、炎熱的公路，竟然有警察影快相！好在無超速，但都被截停。他稱我們無超速，只想要點飲料。只見他獨自一人、一架車於樹蔭下捉超速，不知是否得罪上司呢？其實於這些落後國度，他大可屈我們超速的。見他咁慘，憐憫之心頓起，給了他一罐冰凍飲品。他稱如有人超速，開罰單後便要返回Rundu繳交罰款。嘩，現在開了兩小時車，想起要返轉頭都不禁抹一額汗⋯

見佢都幾好人，臨走時醒多支啤酒比佢，叫佢下班後才飲。

Day 20待續。。。

開車太耐都不時再停下來，從雪櫃取出冰凍嘅飲品來享用，今次就食蕉來做下午茶