Day 5 身份認同...(拉脫維亞里加)

(Day 5) 2012-03-13住宿 ：Riga old town hostel 價錢唔記得
行程 ：立陶宛Siauliai --＞ 拉脫維亞Riga

波羅的海寒冷指數:0


尋晚住好有鐵幕感覺既酒店


尋晚半夜輕微肚痾,瞓得唔太好… 今朝晨早0700起床,諗住搭0915果班巴士去Riga！ 去Riga唔同既巴士公司收費亦唔同,只係早一小時開出既巴士,就貴三份一,竟要$40-LT呀！ 我揀係最平既，$28-LT = $84-HKD買完飛去車站旁既商場食早餐先,又食尋晚食過既連鎖店Hesburger,食同一個漢堡包餐! 因為最平既set 只需$7-LT咋！仲有free wifi tim~

之後用埋僅餘既LT買左支水,果然計算得啱啱好~ 淨低幾毫作紀念~
上車時,發覺架呢班最平既巴士都竟然有free wifi架！我諗free wifi係立陶宛係好基本咋！立陶宛週圍都有free wifi,連幾十蚊港紙既長途過境巴士都有!

香港都無！(講既係平民價，機鐵果D唔算）


我又記得出發前,又有同事話我,[究竟有無命返架！成日去D落後國家•••]呢度治安也不比香港差,人也十分nice~ 所以我成日用”親切”來形容接觸過既當地人,每一張笑臉我仍然印象深刻~
所以呢•••大部份香港人除左識去日本台灣同泰國外,其他地方都覺得係落後同危險既！

醒吓啦香港人！唔好再孤陋寡聞喇,香港唔係係呢個世界既頂尖度架! 早前中港駡戰時我當然撐香港人啦,不過大陸有句說話鬧我地香港人係啱既,就係話香港人覺得自己永遠高高在上•••香港人？今時今日無左啦•••過境既時候人地識你Mickey !
一個小時到達邊境,BNO再次順利過境~ 係1230到達Riga,係巴士總站既大堂,有找換店,旅客中心等! 用$100-USD只係換到$40-LS！即$1-LS =$15-HKD

一出到室外,見到歐洲慣常用既名車做的士; 另外市內都有電車,比較殘舊,不過唔好用來衡量同城市發達既程度,應該係話保育至啱~ 唔通香港既電車就代表香港落後嗎?


尋晚網上book定既Hostel,係2008年打入十大Hostel架!
“Riga old town hostel”好容易搵到,距離巴士總站只係隔左一條隧道~

我住既係8人大房床位,Hostel Free wifi既! 地下reception係間酒吧黎,夜晚可以有節目啦~

Check in 時reception靚女係法國交流生,係度做part time,先送我一杯熱茶來暖暖肚先~ 我用”特衰”來check in,而又見我有另一本英國護照,就覺得好好奇,於是我解釋比佢聽,97前香港係英國殖民地,所以有兩本護照囉~ 有Oversea字樣架~ 佢哦一聲,即時記起香港既歷史~

係呢一刻,我絕對唔會認自己係英國人！我亦都唔會好似D國內同胞咁,唔認自己係中國人•••早前中港駡戰,內地人鬧我地係英國既狗,話我地唔認係中國人喎•••其實我地認香港人已默認係中國人啦！你估我真係唔想高呼我係中國人咩? 不過我就真係見好多移左民既內地人,只要有其他護照or其他証明,都唔認自己係中國人...去旅行就見得多啦! 明明中國人樣貌都唔認; 而我係工作上親眼見過一個女人,用中國護照過境,另外手持只係美國綠咭咋！（即未入籍）就同我講佢唔係中國人，係美國人•••總知呢D人就係唔認，死都唔認！

咁就真係唔知邊個對中國人無歸屬感Lu... 鬧我地既內地同胞係咪要反思呢？
放低行李就出發遊覽Riga古城! 先醫肚先,食野當然向中央市場進發啦！ 我知道街市一定比較平,街市食到平野係不變既定律! 又可體驗到當地人既生活~ 仲買左兩包茶葉tim~ (打blog其間正值農曆年,第一次沖黎飲,一邊打呢邊遊記,別有一番風味)細細碟薯仔魚+雞肉湯,要$1.7-LS 即$25.3-HKD; 於是
一路食一邊plan今日既行程~



古城唔太大,好快行得晒~ 根據係旅客中心攞既Riga top15 來隨意遊覽~ 古城區比較多教堂,雖然無立陶宛首都既古城區咁多,但係就較為宏偉,如有市內最高既聖彼得教堂~ 正想比錢上有去影Riga既全景,不過望一望個天烏雲密佈,唯有留待聽朝睇吓點啦•••

另一個我覺得係Riga既地標係”The House of Blackhead”聽個名好得意,但外牆就金碧輝煌~








有條橋有好多鎖,好得意~
之後行到結晒冰既河,諗住等多一陣影Riga既夜景,不過真的很大風很凍,企左3分鐘就已頂唔順放棄了••• 於是返古城區既一間麵包舖,飲返杯熱茶定定經先,順便等待天黑,因為想欣賞入黑後既景色~

晚餐$2.69-LS = $45-HKD,返到Hostal既酒吧,上網話呢度D Packbacker經常有party攪架！
不過今日就無••• 於是叫左杯啤酒,靜靜上網搵吓聽日目的地既資料;原本想去既小鎮Cesis,原來只係得一間貴價酒店... 唯有去附近既Sigulda過一晚啦!
瞓覺前睇左場我鍾意既利物浦打比,終於贏波啦！Yeah~謝拉特仲入三球Tim~