一大清早六點起床 ,食左 D 尋晚買返黎既麵包做早餐 ,
就出發前往西岸 "死者之地”遊覽
當我行到河邊，已有一個自稱係的士司機既人，
問我係咪過河 ,一百蚊可以包架的士一日
我當時無理會佢，因為我心目中早已有參觀帝王谷既玩法
就係騎騾仔遊覽
佢一路跟到我上船，船上只係得幾個人，
佢不停煩住我由一百蚊，講到六十蚊
其實我唸，話就話包一日啫，坐的士去均帝王谷，皇后谷等幾個景點
可能都唔使兩個鐘就玩完ｌｕ，咁又有咩野意思呢～
坐左十幾分鐘船 ,到達西岸 ,個司機繼續跟住晒 ,行前少少就見到有人出租騾仔
由於得我一個遊客 ,佢當然亦都過黎兜我啦 ~
一問之下竟然要三十埃磅一個鐘 ,我唸起碼都要玩五至六粒鐘woo... 咁咪幾貴~
唸住我掉頭走佢會減價啦...點知佢企硬woo !!!
不過佢同個司機繼續不停煩住我唔減價就算啦 ,
我走左入一間酒店 ,用十埃磅租左一架單車一日
( 即HKD 15 蚊咋 )
清晨既尼羅河
=====================================================================
隨即向帝王谷出發 ,唸住由最遠既帝王谷開始玩起
沿住馬路踩單車 ,可能由於太早既關係 ,條路都無車經過 ,只係得我一個人踩單車
踩左十幾二十分鐘 ,係路邊有兩坐好似坐立既獅身人面像叫
"曼農巨像" Colossi of Memnon
曼農巨像
於是落車抖吓同影相 ,咁啱亦有一車遊客落車參觀
參觀完後 ,去到離曼農巨像不遠處 ,有條村莊
從書中得知叫古納村Village of Gurna
古納村建築物外牆有好多精美既圖案 ,而且十分有特色
不過我寫呢篇遊記前幾個月 ,從報紙得知埃及政府要完全清拆古納村
因為要保護村地下好多未發掘既墓穴
我就係呢條村 ,用左$ 60埃磅租一隻騾仔一日
其實我都無唸過再可以租到騾仔架 ,而且仲比碼頭平咁多tim~
於是有一個肥仔做我"騾伕" , 肥仔有一個朋友同埋另一隻騾仔一齊行
原來我騎果隻係爸爸 ,另一隻係仔仔黎架~
古納村
=================================================================
我首先要佢帶我去帝王谷 ,佢一開始就帶我往山上走
由起初斜度約有45度 ,到後期有d差唔多60度
我見地下D 沙石咁鬆 ,隻騾仔又咁辛苦 ,望一望後面原來好高
跌左我落山咁點算 ,於是我都係落地行啦 !
上山途中 ,終於見到有其他人同我用同一種遊覽方式 "騎騾仔" 遊覽
佢地黎自歐洲的一家三口 ,一人騎一隻騾仔 ,連同帶路既埃及人自己騎一隻
好快就爬左我頭 lu~ 因為我係用人手帶住行嘛 !
上到山頂就沿住懸崖邊行 都咪話唔危險 !
約莫差不多一個鐘 ,終於到左帝王谷既後山
肥仔同騾仔就係山上等我 ,佢話佢地落山會比差人打woo...
我於是就自己步行下山參觀帝王谷
開始上山啦
我就係呢D懸崖邊度行啦 !!!
途中遇到既騾仔群
到左帝王谷啦 !!! 山下就係帝王谷 !
===================================================================
落到去帝王谷唸住開始參觀啦 ,突然唸起原來未買飛入埸架
唔記得左我係無經正門入左黎tim~
由於帝王谷內部好大 ,所以搭接駁車到正門售票處買飛
一張飛可以選擇三個墓穴參觀
不過最可惜既係額外收費既圖坦卡門墓穴同一些書中推介既墓穴都已關閉
係參觀其間 ,見到團香港團正在遊覽 ,仲有一對夫婦要求幫佢地拍照tim~
其間有D 團友對我好好奇 ,問我玩左幾多日 ,去過邊等問題...
仲讚我叻仔tim~ 哈哈~
雖然無講廣東話只有4至5日 ,但一講上黎竟然有一種生疏既感覺...
參觀完帝王谷就上返山上會合肥仔 ,騎騾仔往皇后谷出發lu~
帝王谷其中兩個墓穴
=====================================================================
行左差不多45分鐘到左皇后谷 ,肥仔佢地係一個山洞等我
入到皇后谷 ,規模比帝王谷細好多 ,大部份墓穴都已關閉
而谷內既遊客亦只有寥寥可數...
我都只係逗留左十零廿分鐘走離開 lu !
返到肥仔等我既洞穴 ,發現洞內有好多古埃及既圖案係牆壁上
唔知會唔會係一個未被發現既墓穴呢?
於是肥仔帶返我回古納村 ,我見肥仔人品好好 ,唔貪錢又無任何怨言
所以額外私人醒左$ 20 蚊比佢 ~
返到古納村已經中午12點 lu ,騎左5個鐘騾仔人都散晒 !
我騎果隻係爸爸 ,後面既係仔仔~
山上風光
無人參觀既皇后谷
呢度係肥仔等我既洞穴 ,會唔會係未被發現既墓穴呢
==================================================================
因為係希臘Santorini 已錯過了騎騾仔 ,所以騎騾仔遊覽對我黎講好新鮮
不過騾仔無啦啦成日都會發脾氣唔行 ,
並"嗚嗚" 聲大叫 ,情況都幾攪笑 !
不過照我所見騎騾仔遊覽帝王谷既人極少 ,沿途只係見到果一家三口...
於是攞返架單車 ,向最後一個景點哈跟蘇神殿 "Temple of Hatshepsut" 進發 !
呢個肥仔就係我既騾伕
沒有留言:
張貼留言