Day 14 人生首次流浪正式開始啦!!! (阿斯旺)

2005-7-14 Day 14 阿斯旺 住:Hotel 約HKD$ 45

 

行程表

 

朝早9 點終於都左阿斯旺啦~  火車都好準時 !

落車後即刻去櫃台,幾經辛苦終於買左明日傍晚既火車票往樂蜀

點解辛苦? 因為果度d人唔會排隊law...

十幾人堆晒係櫃台窗口七嘴八舌...

一出火車站就有好幾個人問我要唔要住宿 ,

我就跟左一個人去睇吓 ,佢聲稱十蚊埃磅一晚咋! (即HKD $15)

不過我亦聲明睇吓環境先 !

 

行左幾分鐘 ,佢帶我入左係一條後巷既樓梯 ,

上到房見到十分簡陋 ,仲衰過Nori 最初係開羅住既地方 !

個窗只係望住後巷 ,雖然有冷氣...

我緊係無係度住啦 !

 

我想住係望向尼羅河既地方 ,於是我朝向尼羅河 ,沿著河畔一路行 ,

比我係一間五星級酒店對面 ,搵到間比較殘舊而且極少人住既酒店 ,

入到房間一看 ,雖然是殘舊d ,但係其他十分滿意呀 !

 

房間十分大 ,有冷氣 ,獨立廁所, 仲有個露台望向尼羅河 ,

對岸望正貴族陵墓(Tomb of the Nobles),

都只係HKD$ 45咋 !!! 你話仲使唔使住比較新 d 既五星級酒店呢

 

去返接待處攪完check in 後 ,

負責人立即問我 join 唔join tour去Abu Simbel神殿 ,緊係join啦 !

團費$60埃磅 ,仲去埋其他景點...

因為書中講 ,要去Abu Simbel 神殿必需參加 tour 朝早由軍隊護送前往架 ,

因為保護遊客免受恐怖襲擊law !

 

由於 tour 每逢晨早出發 ,攪到我依家無所事事 ,咪沖個涼瞓一陣law... 點知...

點知一瞓就瞓左三粒鐘...望一望隻錶已經下午一點幾啦!!!

 

晨早8點終於到左阿斯旺lu

 

阿斯旺火車站外

 

我住既酒店露台既風景

 

=============================================================

唔想浪費時間 ,我就去左河邊行吓 ,一路行就不停有人問我要唔要船

既然我無咩野做咪用 $ 15 埃磅包架帆船游吓船河law~

望住船家調教風帆同掌舵 .係船欣賞吓兩岸既風景 ,

西岸埃及人認為係死亡之地 ,所以人民主要住係東岸 ,

而西岸則主要是陵墓

 

係船上突然想去河中心既一個島叫大象島(Elephantine Island) ,

遊完船河叫佢係個島放低我 ,一落船就有幾個皮膚黑黑的細路走出黎 ,

話只需比 $ 20 埃磅就可以帶我遊覽島上既努比亞村(Nubian Village)

返正無野做咪跟佢行吓law...

從書中講 ,努比亞人原本居住係埃及同蘇丹之間既地區 ,

不過埃及後來興建水壩 ,呢處土地就比河水淹沒 ,

於是努比亞人就遷徙到附近地區居住 ,而大象島就是其中一處...

一個民族完全散晒真係慘!!!

 

幾個細路帶我週圍參觀 ,村內好殘舊同好少人 ,

只係見到d 細路 ,佢地話村內有人過身 ,所以d村民去晒出席當地既儀式...

之後仲同佢地踢波tim~  踢到身水身汗...

 

努比亞村

 

 

 

就係呢班"阿Dee"帶我週圍玩啦~

 

飲完支汽水同抖左一陣 ,突然好想坐帆船係尼羅河上睇日落呀 ~

班細路都有帆船 ,於是比左 $20 埃磅兩個鐘 ,

叫佢帶我兜大象島一個圈 ,佢仲話帶我去島後面睇鱷魚tim~

係船上見佢地用個膠樽就裝 d 河水上黎飲 ,我見d 河水十分渾濁 ,咁都飲得???

不過無耐就無風lu... 帆船都行唔到...當然去唔到睇鱷魚啦 !

只係望住太陽緩緩咁係大象島下降落 ,

真是夕陽無限好呢~ 

 

"夕陽無限好"亦都係陳奕信當時既新歌

係架船上唔經唔覺就兩個鐘lu~

 

輕帆暢遊尼羅河~

 

在帆船上睇日落

 

遊完船河都已經7點幾lu~  於是逛左陣市集,

買左個雞肉捲做晚餐同一支甜筒一路行一路食,

然後再買幾個橙返酒店食...

返到酒店,望一望約有八層高,但全都烏燈黑火,唔知成間酒店有無十戶人住呢...

至少係我果層感覺唔到有人氣...

 

返到酒店,看到對岸既貴族陵墓打晒燈,好靚呀!